Pertsonalizazioa
Eredu honen bitartez, produktu, ingeniaritza edo zerbitzuko irtenbide pertsonalizatuak eskaintzen dituzten enpresek bezeroen behar eta aurreikuspenei erantzuten diete, beren prozesuak eta jarduerak egokituz (diseinua, fabrikazioa, zerbitzuak egitea, etab.). Enpresak gai dira beren eskaintza eta prozesuak egokitzeko bezeroen eskakizunei erantzuteko, arin eta modu lehiakorrean erantzunez, bezeroarekin zuzenean hitz eginez eta haren baldintzak ulertuz eta betez. Enpresa horien erronka da proposamenak birkonfiguratzea eta ahalmenak eboluzionaraztea, bezeroen beharrei erantzuteko, eta, horretarako, egokitzapen prozesu etengabea behar da. Aitzitik, bezeroentzako irtenbide bereziak garatzeak aukera ematen die balio proposamenen katalogo zabala garatzeko, bezeroen beharrak eta itxaropenak zehatz ezagutzearekin batera.
Adibideak
Symeico pieza metalikoen pintura industrialaren sektoreko enpresa da, gainestaldurako irtenbide espezifikoak eskaintzen dituena, pintura likidoaren eta pintura hautsaren bitartez. Enpresak bezeroen beharren arabera pertsonalizatzen ditu bere irtenbideak, gainestaldurako behar eta arazo bakoitzerako irtenbide egokiei buruzko aholkularitza teknikoa emanez.
Arrakasta faktoreak
- Prozesu malguak
- Produktuak eta prozesuak diseinatu eta berritzeko gaitasuna
- Bezeroekin hitz egiteko gaitasuna
Erronkak
- Bezeroetara egokitzeko gaitasuna
- Balio katearen eta hornidura katearen kudeaketa
- Bezeroek eskatzen dituzten teknologiak txertatzea
Erlazionatutako patroiak
Irtenbide integralak
Eredu honen bitartez, enpresek bezeroaren premia bati erantzuten dioten produktu, osagai, teknologia eta zerbitzuetan oinarritutako konponbide integralak hornitzen dituzte, eta horiek balio proposamen bateratu baten bidez integratzeak sinergia eta onura handiak sortzen dizkio bezeroari.
Diseinua eta marka
Eredu honen bitartez, markaren irudi indartsua duten enpresak biltzen dira, erabiltzaileen diseinua eta esperientzia egiten dutenak, hori baita beren produktu eta zerbitzuen elementu bereizgarria. Beren eskaintza, kasu askotan, segmentatuta dago eta bezero tipologia desberdinei erantzuten die, bezeroen behar espezifikoetara zuzendutako diseinuarekin.
Integratzailea
Eredu honen bitartez, enpresek balio kateko jarduera gehienak kudeatzen dituzte. Horrenbestez, balioa sortzeko prozesuan behar diren baliabideak eta gaitasunak kontrolatzen dituzte, intsumoen hornikuntzatik hasi eta bizitza erabilgarriaren amaieran produktua berreskuratzeraino.
Fokalizatuak
Eredu honen bitartez, enpresek balio katearen oinarrizko konpetentziei erreparatzen diete. Balio kateko gainerako segmentuak azpikontratatu eta aktiboki koordinatzen dira. Horrek aukera ematen dio enpresari kostuak murrizteko eta hornitzaileen eskalako ekonomiei etekina ateratzeko. Gainera, oinarrizko konpetentziak kontzentratzeak errendimendua areagotu dezake.
Aldatzearen kostuak
Eredu honen bitartez, enpresek bezeroen hornitzailea, produktua edo zerbitzua aldatzeko aukera baldintzatzen duten produktuak eta zerbitzuak eskaintzen dituzte. Enpresak aldaketaren kostu horiek sortzen ditu mekanismo teknologikoen bidez edo interakzio handiko produktu eta zerbitzu paketeak eskainiz. Estrategia komun bat da produktu nagusia prezio baxuan edo baita doan ere eskaintzea, eta horren inguruko erabili eta botatzeko produktuak marjina handiekin saltzea.
Ko-sorkuntza
Eredu honen bitartez, enpresek lankidetza harremana ezartzen dute bezeroekin, balioa elkarrekin sortzeko. Enpresek bezeroak integratu ditzakete beren berrikuntza prozesuetan, edo bezeroen eskura jar ditzakete behar diren bitartekoak, enpresak bere sormena ustia dezan, bien mesederako.
